Murairo neNyasha zvinhu zvakaoma kuyananisa

We update studies as the Lord Jesus leads us. You can find the latest update of this study at ChurchAges.net

Murairo hauiti kuti vanhu vave vatendi vari nani

Mabhuku mashanu ekutanga muTestamente Yekare anoiswa muboka reMurairo.

Asi pakatsiviwa tabernakeri neTembere, Mirairo mitsva yakawedzerwa muTestamente Yekare.

Murairo unosanganisira zviyera yera zvakawanda uye mhemberero dzakawanda

Kukura kweMurairo kwaisanganisira Mitemo ine gumi yakapihwa Mosesi naMwari paGomo reSinai (rinonziwo Gomo reHorebi).

Mutemo wechina ndeweSabata rezororo rinova musi weMugovera kumaJuda. Murairo uyu ndiwo usingadiwi nekereke nhasi. Vanoda kuti vanhu vaende kukereke musi weSvondo.

Kuti vabudirire pachinangwa chavo ichi vakasarudza kubvisa Murairo kuti vashande vasinawo. Kuti vafuratire Murairo wechina.

Murairo wakaputswa zviri nyore kwazvo. Marudzi gumi aIsraeri paakapesana kubva kuna Juda naBenjamini mambo wavo mutsva akabva abva paMurairo Israeri yese ikamutevera.

II MAKORONIKE 12:1 Zvino vushe bwaRehoboami bwakati bwasimbiswa, iye ava nesimba, akarasha Murairo waJEHOVA, navaIsraeri vose pamwechete naye.

Vanhu nehurema vakatevera mutungamiri, chero dai mutungamiri achikanganisa vanomutevera.

Kefasi Muprista Mukuru akagumisa Murairo nekuputsa Murairo waive wakatarirwa muPrista Mukuru panguvo dzake kuti hadzaifanira kubvarurwa.

MATEO 26:65 Ipapo muPirisita mukuru akabvarura nguvo dzake akati wamhura Mwari!

Mosesi aive audza muPrista mukuru Aroni nevanakomana vake kuti havaifaniri kubvarura nguvo dzavo.

REVITIKO 10:6 Zvino Mosesi akati kuna Aroni nokuna Ereazari nokuna Itamari, vanakomana vake, "Musasunungura vudzi remisoro yenyu, kana kubvarura nguvo dzenyu, kuti murege kufa, naiye arege kutsamwira ungano yose;

Nekubvarura nguvo dzake, Muprista Mukuru akagumisa Murairo.

Mwari akaona izvi akazviratidzira nekubvarura chidzitiro chemuTembere pakafa Jesu.

MATEO 27:51 Ipapo, tarira, chidzitiro chetembere chakabvaruka napakati, kubva kumusoro kusvikira pasi. Nyika ikadengenyeka, mabwe akatsemuka

Pamaonero evanhu zvinoita sekuti Murairo waive waguma uye Sabata (raive musi weMugovera) raive rabviswa.

Murairo waive usina kukwanisa kuita maJuda vanhu vari nani.

Nekuroverera Messiasi vaive vanyura kwazvo mudziva rezvakaipa.

Zvisinei, zvinhu zvaive zvisina kutemwa nekuomeswa.

Murairo unotiwo, “Usauraya” hausi mutemo unogona kubviswa. Tinoda murairo iwoyo kuti nyika ive yakanaka.

Murairo waive mutsvene wakanaka

VAROMA 7:12 Naizvozvo murairo mutsvene, nomutemo mutsvene, wakarurama, wakanaka.

Paive pasina chakaipa paMurairo iwo pachawo.

Tendai muna Mwari umwechete chete. Musazviitire mifananidzo musadane Zita raMwari pasina.

Kudza baba namai. Musauraya, musaite vupombwe, musaba, musanyepa, musanyengera.

Mirairo mipfumbamwe iyi haibati pamaJuda nemaKristu anotenda nguva dzese.

Hakuna chakaipa chero paumwechete wemirairo iyi.

Mirairo mitanhatu yekupedzisira inobatawo pavanhu vechitendero.

Chingorangairai muchirarama munyika mune vanhu vanenge vachiurayana, kunyeperana, kubirana kunyengerana, kuramba vabereki nekuita hupombwe. Vazhinji vasiri vezvitendero vanoda mitemo kuti vasaite hunhu hwakadai.

Kana muchida nzvimbo dzekugara dzakasununguka uye dzine vanhu vane hunhu, mitemo iyi inofanira kuva zvikamu zvemazuva edu ese.

Kudza baba namai. Usauraya, usaite hupombwe, kana kuba, kana kunyepa, kana kunyengera.

Mirairo iyi yakafanira pamunhu wese akakwana. Haimanikidzirwi patiri nekuti hazvifambirane nekodzero dzekuita kuda kwedu. Inokwanisa nzvimbo inoraramika mairi. Saka, kuzvidza mirairo mitanhatu iyi hakurevi chinhu.

Jesu akauya kuzokudza Murairo

ISAYA 42:21 Zvakafadza JEHOVA, nokuda kwokururama kwake, kukudza murayiro nokuurumbidza

Jesu akauya kuzokudza Murairo.

Hamuna chamunofanira kuita kuti munzi maita chivi. Kutongofunga nezvacho kwakatoipa.

MATEO 5:27 Makanzwa kuti zvakanzi nevakare, usaita vupombwe,

28 Asi ini ndinoti kwamuri, mumwe nomumwe unotarisa mukadzi achimuchiva, watoita vupombwe naye mumoyo make.

MuTestamente Yekare maifanira kuita chimwe chinhu chakaipa kuti munzi matadza.

MuTestamente Itsva hamutotenderwi kufunga nezvacho, kana kuva nezano rekuchiita.

MATEO 5:20 Nokuti ndinoti kwamuri, kana kururama kwenyu kusingapfuvuri kururama kwavanyori nokwavaFarise, hamungatongopindi muvushe hwokudenga.

MATEO 5:21 Makanzwa kuti zvakanzi kunavekare, usavuraya. Aninani unovuraya uchapara mhosva ingatongwa.

MATEO 5:22 Asi ini ndinoti kwamuri, unotsamwira hama yake pasinemhaka, uchapara mhosva ingatongwa. Unoti kuhama yake Raka, uchapara mhosva pamakurukota. Unoti benzi uchapara mhosva kuti atongerwe Gehena romoto.

“Raka” zvinoreva kushaiwa maturo.

Kristu akatifira, saka aifunga kuti takakosha.

Hakuna chikamu cheMurairo chichabviswa

RUKA 16:17 Asi zvakareruka kuti denga nenyika zvipfuvure, pakuti tsanga imwe yomurairo ikoneswe.

MATEO 5:18 Nokuti zvirokwazvo ndinoti kwamuri, kusvikira denga napasi zvichipfuvura, yota imwe kana tsanga imwe yomurairo hazvingatongopfuvuri, zvisati zvaitika zvose.

Murairo wose weTestamente Yekare uchazadziswa nguva yekuguma painosvika. Hakuna chinoraswa.

Izvi zvinoitika sei? Izvi zvichatora muono wemweya.

MATEO 5:19 Naizvozvo aninani unoputsa mumwe wemirairo miduku iyi, akadzidzisa vanhu kuita saizvozvo, uchanzi muduku muvushe hwokudenga. Asi unoirita, akaidzidzisa uchanzi mukuru muvushe hwokudenga.

Kana mukaedza kubvisa chero chinhu pamitemo yeTestamente Yekare, zvisinei nekuti chiduku sei, munongoderedzwa Kudenga nekuda kwekutadza kwenyu kunzwisisa zvinhu izvozvo.

Kuputsa kana kusarura chero yeMitemo yeTestamente Yekare hakutotenderwi.

Saka, tinorwisa sei Murairo tichipinda muEvangeri reNyasha?

Nyasha dzeTestamente Itsva dzinofanira kuziviswa kubva pamurairo weTestamente Yekare.

Murairo ndiwo Mumvuri kana munongedzo weNyasha

VAHEBERU 10:1 Nokuti murairo zvaunomumvuri wezvinhu zvakanaka zvino vuya usati uri mufananidzo chaiwo wezvinhu izvozvo, haungatongogoni kukwanisa avo vanoswedera gore rimwe nerimwe naizvozvo zvibayiro zvavanoramba vachibayira Mwari.

Murairo wakakosha nekuti unosika mumvuri kana munongedzo uyo Kristu anoshandisa kuzadzisa hushumiri hwake.

Basa rake rakaoma rakadzvanyirirwa rakazadzisa Murairo.

NeNyasha ndakaponeswa nemabasa ake, kwete nemabasa angu.

Ndingaziva sei kuti Jesu ndiye chaiye wekutevera?

Nekuti akazadzisa mitemo yese yeMurairo.

Mumvuri wechinhu unotiratidza miganhu.

Murairo weTestamente Yekare unozivisa miganhu wehushumiri hwaKristu paanodzikinura Kereke.

Semuenzaniso, muTestamente Yekare, paive negwayana rePaseka raiurairwa zvivi zvevanhu.

Jesu akava Gwaiana guru rePaseka rakaurairwa zvivi zvevanhu vose.

I VAKORINTE 5:7 Nokuti paseka yedu, yakatibayirwa isu, ndiKristu;

Murairo mumvuri weKuda kwaMwari. Nekudaro unosika muganhu unofanira kukwanirana neNyasha. Unofanira kukwana mumiganhu yemumvuri wako muzvikamu zvekuti mumvuri wako une musoro makumo nemaoko maviri.

Gwaiana rePaseka reMurairo raive muganhu kana mumvuri waifanira kukwana Kristu.

Akasarudzwa pazuva rechigumi, raive musi weSvondo yeMichindwi, akavurawa zuva rechi 14 raive china chakatevera.

Nekudaro akaita husiku hutatu ari muBwiro (China husiku, Chishanu husiku, neMugovera husiku) akamuka musi weSvondo magwanani. Sezvakaita Jona akaita husiku hutatu ari mudumbu rehove huru.

Saka, zviitiko izvi zvese zveMurairo zvakazadziswa zvakarurama muna Kristu. Zviitiko izvi zvaive zvakazadziswa muna Kristu. Zviitiko zveMurairo izvi hazvigoni kundiponesa, asi Kristu akazadzisa Murairo nekukudza gwayana repaseka kusvika ratsiviwa naMessiasi, ndiye nanogona kundiponesa.

Saka, hupenyu hwemaprofita hwaivewo chikamu chemunongedzo wekuti Kristu aifanira kuzadzisa izvi.

RUKA 24:27 Ipapo akatanga kunaMosesi navaporofita vose, akavadudzira zvakanyorwa pamusoro pake muMagwaro ose.

Jesu akazadzisa zvaidiwa paGwaiana rePaseka.

Saka Murairo wakabereka Nyasha.

EKSODO 12:3 Taurai kuungano yose yavaIsiraeri, muti, `Nomusi wegumi womwedzi uno mumwe nomumwe ngaatore gwayana, vachiverenga dzimba dzamadzibaba avo; mhuri imwe neimwe ive negwayana rayo.

EKSODO 12:6 zvino murichengete kusvikira pazuva regumi namana romwedzi, ipapo ungano yose yavanhu vose vaIsiraeri ngavariuraye madekwana.

MATEO 12:40 Nokuti Jona sezvaakava mudumbu rehove huru mazuva matatu novusiku hwutatu, saizvozvo Mwanakomana womunhu uchava mumoyo wenyika mazuva matatu novusiku bwutatu.

Saka, kana ndikatenda ndinenge ndichiterera Murairo ndisina kana kuedza nekuti ndine Gwaiana rePaseka rakasarudzwa musi wechigumi rikauraiwa musi wechigumi nemana akaita husiku hutatu ari muguva. Nekutenda muna Jesu, ndinenge ndafambirana neMurairo ndotenda kubasa rake guru kwete rangu.

Kuponeswa kwangu kwakauya nekuti Hupenyu hwaKristu hwakakwana mumumvuri kana mumiganhu yeMurairo waMosesi naJona. Murairo iwoyo unobata kuvatendi vese nguva dzese. Mutendi wese zvinoreva kuti ane Gwaiana rePaseka rinobvisa zvivi zvenyika.

Dzokerai kuchivi chekutanga.

GENESISI 3:21 JEHOVA Mwari akai­tira munhu nomukadzi wake nguvo dza­matehwe, akavafukidza nadzo.

Hamugoni kuwana dehwe remhuka musina kuiuraya. Saka, Mwari akauraya gwayana risina mhaka akapfekedza Adamu naEva nematehwe ane ropa. Vose vakabva muEdeni vakafukidzwa ropa regwayana zvakaunza ruponeso kwavari.

Waive Murairo uchiita mumvuri kana muganhu weZano raMwari.

Kuponeswa kwangu kwakaunzwawo neRopa reGwaiana kuti ndigone kupfeka kururama kwake.

Nekutenda muna Kristu saMuponesi wangu, ndinoterera Murairo wakazadziswa naKristu nechipiriso chake chaakaita pakudeura Ropa rake. Handivimbi nemabasa angu. Chandinogona kuita chete kutendeuka ndofamba pasi peRopa rake nekutenda kwekuti ndinowana kuregererwa negwara.

Nei Mwari akasarudza kuuraya Gwaiana? Nekuti Mwari aikwanisa kunge akatora shinda kubva kugwayana akavaitira nguwo dzeshinda kuti vapfeke asina kuuraya nekuderura ropa. Saka Mwari akadeura ropa nekuziva.

Zvivi zvakatanga apo mhuka yakatukwa ikashanduka kuita nyoka, kana chipfuwo, chakadeura ropa raEva rehumhandara hwake. Chivi chekutanga chaive chemhuka ichideura ropa. Kuti Mwari aripire chivi aida ropa remhuka isina mhosva.

Ruponeso rwaida kutendeuka kunobereka chiitiko chekuyambuka.

Mhosva dzevatadzi dzaipinda mugwayana rakarovererwa apo kururama kwemhuka kwaipinda muvatadzi.

Asi hupenyu hwegwayana hwaisakwanisa kunopinda muvatadzi. Hupenyu hwemhuka haugoni kurarama mumunhu. Saka, mutadzi aisagona kushanduka kuti ave munhu ari nani. Ndiko kwaive kutuka kweMurairo.

Vatadzi vaitendeuka kubva kuzvivi zvavo asi vaisagona kuraasa rudo rwekutadza.

Saka zvibairo zvaifanira kuramba zvichipirwa.

MAPISAREMA 19:7 Murayiro waJEHOVA wakakwana, unoponesa mweya;

Murairo ndiwo mumvuri wakarurama kana muganhu uyo Evangeri reNyasha rinofanira kukwana mauri.

Murairo pachawo hauna kuipa kana kukanganiswa. Zvikamu zvese zveMurairo neimwe nzira zvinotungamirira kuEvangeri reNyasha.

MaMoziremu nemaHindu kutenda kwavo hakukwani mumumvuri weTestamente Yekare. Saka hakugoni kutiponesa.

Murairo unofanira kuzadziswa muzvikamu zveMweya zvakadzama naKristu nekereke yake.

MATEO 5:17 Musafunga kuti ndakavuya kuparadza murairo kana vaporofita. Handina kuvuya kuparadza asi kuzadzisa.

Izvi zvinoreva kuti Murairo unofanira kuziviswa kuita zvirevo zvakadzama zvisingazivikanwe nevanhu pavanoda kubvisa Murairo.

Murairo wakafanana negonye rakashata rinozoshanduka kuita chinhu chakanaka bhatafurayi.

Asi chinhu chakanaka chinobhururuka ichi chinenge chabva pagonye rinenge richishanduka.

Dambudziko rine Murairo

Asi maive musina tsitsi muMurairo.

VAHEBERU 10:3 Munhu, wakaramba murairo waMosesi, unofa asinganzwirwi tsitsi, kana panezvapupu zviviri kana zvitatu;

Murairo hauiti kuti vanhu vaite vanhu vari nani.

VAHEBERU 10:3 Asi nezvibayiro izvozvo vanoyevudzirwa zvivi gore rimwe nerimwe.

Nhau yekuti zvibairo zvinofanira kudzokororwa gore rega rega zvinoreva kuti zvaive zvisina kukwanira pakubvisa rudo rwekutadza.

Kuchengeta Murairo hakugoni kutiponesa. Hatiponeswe nemabasa.

Mabasa akanaka mucherechedzo wekutenda kwedu asi mabasa akanaka haagoni kutiponesa kuba kugehena.

VAEFESO 2:8 nokuti makaponeswa nenyasha, nokutenda; izvo zvisingabvi kwamuri, asi chipo chaMwari;

9 hazvibvi pamabasa, kuti kurege kuva nomunhu unozvikudza.

VAGARATIA 3:10 Nokuti vose vari vamabasa omurairo, vari pakutukwa; nokuti kwakanyorwa, kuchinzi: Vakatukwa vose vasingarambiri pazvinhu zvose zvakanyorwa mubuku yomurairo, kuti vazviite.

Kutuka kweMurairo kwaive kwekuti hauna kubvira wagona kuita kuti vanhu vave vari nani kana vaita mabasa aya.

Kumwe kutukwa ndekwekuti zvaive zvisingagoneke kuti munhu agone kuchengeta mirairo yese, nguva dzese. Zvisinei nekuti wachengetedza mirairo mingani, kana ukaputsa murairo mumwechete unenge uri padambudziko. Murairo waive wakafanana nengetani dzine padzakabatanidzwa pakawanda. Kana mubatanidzwa mumwechete ukakochonoka, ngetani dzese dzinobva dzadambuka.

VAGARATIA 3:13 Kristu wakatidzikinura pakutuka kwomurairo, iye akaitwa chakatukwa nokuda kwedu, nokuti kwakanyorwa, kuchinzi: Vakatukwa vose vanoturikwa pamuti!

Kutuka kukuru kweMurairo ndekwekuti wakatiudza kuti chivi chaive chii asi hauna kubvisa rudo rwekuita zvivi kwatiri.

VAKOROSE 2:14 akadzima rugwaro rwakanga ruchirwa nesu pazvirevo zvarwo, ruchipesana nesu; akarubvisa irwo pakati pedu, akarurovera pamuchinjikwa

Kururamisirwa ndeapo mirairo yese inenge ichiteverwa.

Vanhu vanofanira kutevera Mirairo. Vanofanira kuita zvinhu chero zvavanenge vasingadi kuita.

Kuterera Murairo hakuna kubvira kwaita kuti vanhu vave vanhu vari nani.

Kuchengetedza Murairo hakuna kumisa vanhu kubva pakuita pfungwa dzakaipa nezvinangwa zvakaipa.

Kuchengetedza Mirairo hakuna kumisa kuda kwavo kwemukati kwekuda kutyora Murairo.

Mwari anotitongera kutadza kana tikangofunga zvakaipa chero tisina kuzviita zvakaipa zvacho.

JAKOBO 2:10 Nokuti munhu unochengeta murairo wose, akagumburwa kunechinhu chimwe chete, wava nemhosva kunezvose.

Kumwe kutuka kweMurairo ndekwekuti munokwanisa kuchengeta yese, asi kana mukatyora murairo mumwe, munorangwa sekuti makaputsa yese. Murairo waive wakafanana nengetani dzinodambuka kana mubatanidzwa mumwechete wakochonoka. Murairo hauna nzvimbo yekuneta kana kukundikana.

Tine mazuva akatiipira tese patinotadza.

Asi kutuka kukuru kunoverengwa pavanhu vanochengeta Murairo ndekwekuti hauvaite vatendi vari nani muna Mwari.

Kuchengetedza Murairo hakuna kuvamisa kuramba Messiasi nekumuuraya asina mhaka.

Muzvikamu zvekuita kuti vanhu vave vatendi vari nani, Murairo wakakundikana.

Chii chaive dambudziko reMurairo?

Mumvuri une miganhu chaiyo (hapana chakaipa ipapo) asi mumvuri hausi chinhu chaicho.

Kukanganisa kweMurairo weTestamente Itsva kwaive kwekuti vanhu vaifanira kuita mabasa.

Uye chero dai vaiita mabasa ese eMurairo, hazvina kuvaita vanhu vari nani.

Tarirai Mitemo mipfumbamwe yaive isiri mabasa anofanira kuitwa nevanhu.

Mitemo mipfumbamwe yaive mabasa avaive vakaudzwa kuti VASAITE.

Mitemo mipfumbamwe yaive iri zvinhu zvaisatenderwa.

Mutemo wechina weSabata ndiwo wega wainzi vanhu vaite vatevere.

EKSODO 20:8 Rangarira zuva reSabata, kuti urichengete rive dzvene.

Pano paive nechakavanzika.

Vaikwanisa chete kuchengetedza Sabata nekusaita mabasa.

Mutemo wechina, Sabata, uri kuda kubviswa kwazvo nevanoenda kumakereke nhasi unoudza maJuda kuti vasaite chero basa zuva rese reSabata.

Mbeu yezano yakanga yakushwa. Hamugoni kuponeswa nemabasa chero api amungaite.

Zozoro reSabata ndiwo Mutemo wakaoma kunzwisisa

Kukanganisa kukuru kunoitwa nemaKristu ndekwekuedza kubvisa gumi reMitemo.

Iyi inzvimbo yakaoma. Kuchengetedza Murairo hakugoni kutiponesa asi zvakadaro, hatigoni kubva tabvisa Mirairo yese.

Asi uku kuita kusina Mufaro nekuti Mitemo mitanhatu yekupedzisira inonzwisisika, chero kuvanhu vasina kuponeswa. Usauraya, usareva nhema, usaba, usanyengera. Usaita upombwe kana kuramba vabereki.

Mirairo mitatu yekutanga mitemo chaiyo inofanira kuteererwa nevatendi vose. Tendai muna Mwari mumwechete musazviitire mifananidzo yaMwari uye musadana zita Rake pasina mitemo iri nyore kwazvo kuti munhu wechitendero atevere. Mitemo inongoda munhu anofunga.

Chinangwa chaicho chekuda “kubvisa murairo” kuri kuitwa nemakereke ndecherudo rwavo rwekubvisa zuva rechinomwe reSabata rakaregwa kuitwa naro mabasa nemaJuda musi weMugovera.

Havazivi kuti voitei neSabata remusi weMugovera saka vari kuda kubvisa Sabata nekubvisa Murairo wese weTestamente Yekare, nekutaura kwavo kwekuti ndewemaJuda chete.

Asi Murairo unofanira kukudzwa muTestamente Itsva kwete kubviswa.

Gwaiana rePaseka rakakudzwa pakarovererwa Kristu pamuchinjikwa seGwaiana raMwari.

VaPrista Vakuru verudzi rwaAroni vakatsiviwa neMunhu mumwechete, Jesu Kristu Muprista Mukuru. MaPrista makuru echiJuda aipira ropa remhuka kuti varipire zvivi. Jesu akapira Ropa rake iye kuti aripire zvivi. Ropa raMwari.

Achitaura nevakuru vepaguta reEfeso, Pauro akati:

MABASA 20:28 Zvichenjererei imi, neboka rose ramakaitwa vatariri varo noMweya Mutsene, kuti mufudze kereke yaMwari, yaakatenga neropa rake.

Kuriritira keereke yaMwari, yaakatenga neRopa rake.

Kukudzwa kwakadii kubva kuropa remhuka kuenda kuropa raMwari.

Hakuna chinhu chaibviswa. Zano rekuripira kweropa rakakudzwa kubva kuropa remhuka kusvika kuropa raMwari.

Saka, Zororo reSabata rinofanirawo kukudzwa. Sabata zvinreva kuti Zororo.

Zororo reSabata rinokudzwa kubva pakuzorora musi weMugovera kusvika pakuva Rubapatidzo rweMweya Mutsvene runotiita kuti tizorore kubva kumabasa edu ezvivi nekusatenda.

Mutemo wechina.

EKSODO 20:8 Rangarira zuva reSabata, kuti urichengete rive dzvene.

Uyu ndiwo mutemo une dambudziko nekuti hauna kubvira wadzokororwa wakadaro muTestamente Itsva.

Vanoenda kumakereke havatonzwisisi zvinoreva kuti zororo reSabata.

Murairo uyu wakabviswa here? Kwete. Unofanira kukudzwa.

Ruponeso chairwo runosanganisa kuyambuka.

Kristu akatifira. Kukanganisa kwedu nemhosva dzedu zvakaenda paari kururama kwake kukayambukira kuuya kwatiri.

Tinowana kururama kwaKristu nekuita kwemabasa ake amire panzvimbo dzedu. Hatigoni kuita mabasa iwayo aakaita kuti atiponese.

Kutuka kweMurairo nekunyora kwevatariri vaive vachitirwisa ndizvo zvaidiwa kuti tichengete kana kuzadzisa Mirairo yese nemabasa edu enyama. Runyoro rwakanyorwa runotipikisa nderwekuti hatigoni kuterera Murairo zvakanaka. Kana tikakundikana pachikamu chimwechete, tinenge takundikana pazvese sezvinoita ngetani kana mubatanidzwa wadzo mumwechete wakochonoka.

Saka, Jesu akazadzizisa Murairo nemabasa ake. Isu hatina chatakaita kunze kwekutenda maari.

Runyoro rwevatariri rwaive kurutivi rwake nekuti rwainyora mabasa ese aaifanira kuzivisa nekuzadzisa. Paakazadzisa Murairo wese, akabva anzi akarurama nenyasha akatipa kururama kwake achitambira zvivi zvedu.

Ruponeso runofanira kushandirwa nemabasa eMurairo. Asi Kristu chete ndiye aikwanisa kuita mabasa iwayo pachinzvimbo chedu.

Isu taisakwanisa kumaita.

Musiyano weKalvari neMurairo ndewekuti Kristu aive Munhu.

MaJuda akawana kururama kwegwayana raifa asi hupenyu hwegwayana hwaisagona kupinda muvanhu hwovaita vanhu vari nani.maJuda vaikwanisa kumira kushanda musi weMugovera seSabata kana zuva rekuzorora kubva kumabasa, asi vaisakwanisa kumira kutadza.

Mwari akaita mabasa ake ekusika, akazorora nezuva rechinomwe, haana kuzodzokera zvakare kumabasa ake. MaJuda vaisakwanisa kuita izvozvo. Vaifanira kudzokera kunoshanda zuva raizotevera.

Jesu akakudza sei Zororo reSabata?

PaCalvari, zvivi zvedu zvakapinda maari kururama kwake kukapinda matiri.

Asi nekuti aive Munhu, Mweya Mutsvene wake wakapinda matiri zvakare.

Ndirwo Rubapatidzo rweMweya Mutsvene.

Tarirai kuti Muchinjiko wakavanzwa sei mumoyo apo moyo wemunhu unopatsanurwa kuita zvikamu zvina. Moyo wemunhu wakava chigaro chaKristu panyika kana ukatendeuka ukamugamuchira mumoyo mako neKutenda. Mweya Mutsvene uyu unokutonga.

Haamanikidziri Murairo wake pamuri.

Mweya wake unogara maari unokupai shungu nerudo rwekurarama maringe neMurairo wake chete. Munodawo kuzivisa zvakavanzika zvakadzama zveBhaibheri reKing James kuti tizive Chokwadi.

JOHANE 16:13 Asi kana asvoka iye Mweya wazvokwadi, uchakutungamirirai muzvokwadi yose

Huvepo hwemweya waKristu mumoyo mako hunobvisa kwamuri rudo rwese rwekutadza izvi zvinokuitai kuti muzorore kubva kumabasa enyu ezvivi.

Ipapo munenge musisadzokere zvakare kumabasa ezvivi.

VAHEBERU 4:10 Nokuti uyo wakapinda muzororo rake, wakazorora iye amene pamabasa ake, saMwari panaake.

Chivi chaicho ndiko kusatenda.

Rubapatidzo rweMweya Mutsvene runotidzidzisa Bhaibheri rwotiita kuti titende shoko rimwe nerimwe rakanyorwa.

Ndiro zororo redu reSabata rakanyanya kukosha. Tinozorora kubva kukusatenda tobva tatenda Shoko rimwe nerimwe riri muMagwaro.

Mwari haana kubvira ashanda, akazorora, akadzokerazve pabasa rake rekusika.

Rubapatidzo rweMweya Mutsvene runoisa Kristu pamusoro pezvinhu zvose anotokurudzira kusiya mabasa edu ezvivi hatizodi zvakare kudzokera kwaari.

Rubapatidzo rweMweya Mutsvene ndiye Mudzidzisi wemumoyo anotigonesa kunzwisisa chokwadi cheBhaibheri patinoverenga Bhaibheri kana kuti panotsanangura umwe munhu pamusoro peMagwaro kwatiri. Kunzwisisa Magwaro kunogumisa kusatenda kwedu zvachose.

Chivi ndiko kusatenda mundangariro dzedu. Kusatedna Shoko raMwari nekuti Jesu ndiye Shoko.

JOHANE 16:9 Pamusoro pezvivi, nokuti havatendi kwandiri;

GENESISI 2:3 Mwari akaro­pafadza musi wechinomwe, akauita mu­tsvene; nokuti akazorora nawo pabasa rake rose, raakanga asika nokuita iye Mwari.

Zuva reechinomwe raive risina kuropafadzwa nekuti raive zuva rechinomwe. Rakaropafadzwa nekuti Mwari akazorora naro.

Saka, chikomborero chiri pakuzorora, kwete pazuva.

Izwi rekuti Sabata rinoreva kuti zororo.

Jesu akati:

MATEO 11:28 Vuyai kwandiri imi mose makaneta makaremerwa. Ini ndichakuzorodzai.

JOHANE 14:17 ndiye Mweya wazvokwadi; nyika haigoni kumugamuchira, nokuti haimuvoni, kana kumuziva; imi munomuziva, nokuti ugere nemi, uchava mukati menyu.

Kristu ndiye Mweya wechokwadi anogara navo akadzoka ari rubapatidzo rweMweya Mutsvene paMusi wePentekositi. Pazuva iroro vakataura nedzimwe ndimi.

ISAYA 28:11 Zvirokwazvo achataura norudzi urwu navanhu vane miromo yorumwe rudzi, norurimi rwokumwe;

12 akati kwavari, "Zororo riri pano, zorodzai vakaneta; pano ndipo panokutonhorera;" asi vakaramba kuteerera.

Mweya Mutsvene unogara mumoyo unovagonesa kunzwisisa Magwaro. Saka vakazorora kubva kukusatenda kwavo havana kuzodzokera zve pakusatenda kwavo.

Mitemo mipfumbamwe paMitemo gumi haisi vatatariri vanotirwisa. Ndivo vatariri vatinoda uye vanofanira kuvapo munharaunda yakatendeka inogara maKristu.

Hazvigoneke kuti munhu azadzise zvakatarisirwa zvese muTestamente Yekare nezvakaprofitwa nemitambo yese nendudzi dzayo.

Murairo haugoni kutiita vakarurama nekuti wakatipa Mumvuri, kwete chinhu chaicho.

Kristu ega ndiye anogona kuzadzisa zvakatarisirwa uye, nekuti akachengeta Shoko,

Akatumira Mweya wake kuti ugare mumoyo yedu kuti tive nerudo rwake rwekutenda Shoko raakazadzisa.

Tinobva tatenda kwete nekuti tinotofanira kutenda asi nekuti tinoda kutenda.

VAHEBERU 7:18 Nokuti murau wokutanga unokoneswa nokuda kwovutera bwawo, vuye nokuti haunamaturo,

19 (nokuti murairo hauna kukwanisa chinhu), zvino tariro, inopfuvura nokunaka, ikaiswapo, yatinoswedera nayo kuna Mwari.

Kukonesa Murairo. Murairo wegwayana rePaseka riri mhuka yakauraiwa wakakoneswa paKalvari. Waive wazadziswa nekukudzwa usisadzokororwe zvakare

Gwayana repaseka chairo harina kubvira raruramisa chero munhu.

Asi Kristu ndiye aive kuzadziswa kwegwayana rePaseka kwakarurama.

Nekutenda mune zvakaitwa naKristu, tine kuzadziswa kwakarurama kwegwayana rePaseka.

VAHEBERU 10:9 Ndokuzoti: Tarirai, ndinovuya kuzoita kuda kwenyu imi Mwari. Unobvisa chokutanga kuti amise chechipiri.

Gwayana rePaseka raive munhu rakatorwa paKalvari kuti rinozviisa kuva Gwaiana rePaseka rinotora zvivi zvedu zvenyika yese.

Murairo wakarurama asi unoda kuzadziswa muzvikamu zvawo zvese. Hataigona kuita zvose izvozvo.

Asi Kristu akazadzisa Murairo uyu zvakarurama nehuvepo hwake akakudza Murairo.

VAROMA 12:2 Musaenzaniswa nenyika ino; asi mushandurwe murangariro wenyu uchivandudzwa, kuti muidze muzive kuda kwaMwari kwakanaka, kunofadza, kwakakwana.

Kristu matiri, rubapatidzo rweMweya Mutsvene, kunatswa kwendangariro dzedu kuti dzipinde munzvimbo dzeMweya. Nenzira iyoyo ndangariro dzedu dzinogadziriswa kuti dzinzwisise zviitiko zveMweya zvakadzama zveNyasha zvinofamba nemiganhu yemumvuri weMurairo.

Nhandare yehondo iri mundangariro, mune zvatinotenda, kwete mumabasa edu.

Kana tichida Mwari tichida vanhu, tnoterera Mitemo yese.

Kana tichida Mwari, anogara mumoyo yedu seMutemo wechina kuti atipe zororo kubva kuzvivi. Mweya waMwari unogara matiri unotiita kuti tide vanhu.

MATEO 22:37 Akati kwaari: Ida Ishe, Mwari wako, nomoyo wako wose, nomweya wako wose, nokufunga kwako kwose.

38 Ndiwo murairo mukuru nowokutanga.

39 Wechipiri unofanana nawo, ndiwoyu: Ida wakwako; sezvaunozvida iwe.

40 Murairo wose navaporofita zvakabatanidzwa pamirairo iyi miviri.

Ida Mwari woda vanhu. Izvi zvinozadzisa Murairo.

JAKOBO 2:8 Asi zvino kana muchizadzisa murairo wovushe, sezvazvakanyorwa, zvichinzi: Ida wokwako sezvaunozvida iwe, munoita zvakanaka.

MATEO 7:12 Saka zvinhu zvose zvamunoda kuti vanhu vakuitirei, muvaitire nemivo saizvozvo nokuti ndiwo murairo navaporofita.

Mitemo mipfumbamwe inodzokororwa muTestamente Itsva

Panyama, Mitemo gumi yeMurairo inogona kupatsanurwa mina yekutanga yakatarisana naMwari mitanhatu yekupedzisira yakatarisana nevanhu. Kana ndikachiva chaunacho ndoda kuchitora kubva kwauri ndinokunyengera. Une kodzero dzekuva muridzi wezvese zvaunazvo.

Mutestamente Itsva, Jesu akadzokorora Mitemo yese mitanhatu inobata kuvanhu kana vachishanda neumwe munhu kana vanhu.

MARKO 10:19 Mirairo unoiziva, inoti,(6) usavuraya,(7) usaita vupombwe, (8) usaba, (9) usapupura nhema, (10) usanyengera,(5) kudza baba vako namai vako.

Mutemo wechigumi unoti usachiva (kana kuda chine wekwako).

Nekushandisa izwi rekuti “usanyengera” Jesu akapedzisa Mutemo gumi nekuvapa chirevo chakadzama kuti vakudze chirevo cheMitemo.

Tichatarisa zvazvinoreva zvakadzama pamweya.

ISAYA 42:21 Zvakafadza JEHOVA, nokuda kwokururama kwake, kukudza murayiro nokuurumbidza

Izwi rekuti “usachiva” rakashandiswa naPauro kuna VaRoma 7:7

VAROMA 7:7 Zvino tichatiyiko? Murairo zvivi here? Haiswa! Asi handizaiziva zvivi kana murairo usipo; nokuti handizaiziva kuchiva, kana murairo usina kuti: Usachiva;

VAROMA 7:14 Nokuti tinoziva kuti murairo ndowomweya; asi ini ndiri wenyama, ndakatengeswa pasi pezvivi.

Murairo une zvirevo zvakadzama zveMweya. Asi kana tikaramba tiri mumiviri ino yenyama tinodawo kuterera zvinoreva Murairo panyama, seMitemo mipfumbamwe inodzokororwa muTestamente Itsva.

(1) Kuna Mwari umwechete. (2) musazviitira mifananidzo wakavezwa. (3) Usareva zita raJEHOVA Mwari wako pasina kana kupika nezita raMwari (5) Kudza baba vako naamai vako (6) usavuraya. (7) Usaita vupombwe. (8) Usaba. (9) Usapupurira wokwako nhema (10) Usachiva imba yowokwako.

Mitemo mitatu yokutanga yakadzokororwawo MuTestamente Itsva.

Mutemo wekutanga.

Mwari anofanira kuva pokutanga muMoyo mako. Kuna Mwari umwechete.

EKSODO 20:3 "Usava navamwe vamwari kunze kwangu.

MARKO 12:29 Jesu akapindura, akati; Wokutanga ndiwoyu: Inzwai vaIsraeri, Ishe Mwari wedu, ndiye Ishe mumwe chete!

Murairo wechipiri, Usazviitira mufananidzo waMwari.

JOHANE 5:21 Vana vaduku, zvichenjererei pazvifananidzo.

VAHEBERU 1:3 Iye chadzera chokubwinya kwake, nomufananidzo wake chaiye,

Vanhu havagoni kugadzira mufananidzo waMwari chaiwo. Mwari ega ndiye anogona kuita mufananidzo wake sezvaakaita paakauya achigara muna Kristu.

VAKOROSE 2:9 Nokuti kuzara kwovuMwari kunogara maari pamuviri.

Mutemo wechitatu unosanganisira Zita raMwari rinova chakavanzika.

Asi Mwari Baba havana zita muTestamente Itsva.

Mweya Mutsvene haunawo zita muBhaibheri.

“Mwari Mweya Mutsvene” na “Mwari Mwanakomana” havana kumbonyorwa muBhaibheri.

Kuomesa nyaya iyi zviri mberi “Mwari Baba” hazvina kunyorwa muTestamente Yekare asi zvakanyorwa muTestamente Itsva.

Saka, Zita raMwari inhau huru.

MaKristu havazivi Zita raMwari wavo weTiriniti nekuti vanhu vatatu havagoni kuita zita rimwechete.

Vanhu vanoti, “Muzita raBaba, nereMwanakomana, nereMweya Mutsvene” asi havagoni kutiudza kuti zita racho nderekutii. Saka, vanodana Zita raMwari pasina.

Vatadzi havangotuki zita raBaba, reMwanakomana, nereMweya Mutsvene. Asi vanotuka nezita raJesu Kristu.

Murairo wechitatu unoti usadane zita raMwari pasina kana kutuka.

I TIMOTIO 1:20 vamwe vavo ndiHimenio naAreksandro, vandakaisa kunaSatani, vadzidziswe kuti varege kumhura Mwari.

Murairo wechina chete ndiwo unobata nhau yeSabata rekuzora hauna kudzokororwa zvakare muTestamente Itsva.

Saka, rinogona kuva riine chirevo chakadzama chemweya nekuzova rubapatidzo rweMweya Mutsvene runova chiitiko chemunhu naJesu pachavo pasina wetatu.

Nyasha ndidzo Chokwadi chinobva paMumvuri weMurairo

Murairo wakataura nyama dzinokwanisa nedzisingakwanisi kudyiwa.

REVITIKO 11:3 Zvese pakati pemhuka dzinamahwamba akaparadzana, kana zvine tsoka dzakaparadzana, zvinodzeya mungazvidya.

Asi Pauro akatitendera kudya chero nyama.

I VAKORINTE 10:27 Kana mumwe wavasingatendi akakukokerai kuzodya, kana mukada kuenda, idyai zvose zvinoiswa pamberi penyu, musingabvunzi chinhu nokuda kwehana.

Saka izvi zviri kutiudzei?

Nyama inomiririra dzidziso panhau dzakadzama. Mukaka unomiririra dzidziso dzakareruka.

VAHEBERU 5:12 Nokuti, kunyange maifanira kuva vadzidzisi zvino, kana tichitarira nguva, mofanirazve kuti muve nomumwe unokudzidzisai zvidzidzo zvokutanga zvokuvamba kwezvirevo zvaMwari; mava vanhu vanofanira kupiwazve mukaka, vasingapiwi zvokudya zvikukutu.

Saka Murairo wakatiyambira kuti toona sei dzidziso panhau dzakadzama, semuenzaniso Sabata.

Inofanira kudzeya. Kudzeya chiitiko chinoitika murugare. Mombe inoenda kunofura masikati mazuva rodoka yorara yoburitsa mabhora ehuswa ainotsenga zvakanaka isati yaamedza haidi kukanganiswa pakuita izvi. Haidi kumhanyiswa pakuita izvi. Mombe inonyatsotora nguva yayo.

REVITIKO 11:3 Zvese pakati pemhuka dzinamahwamba akaparadzana, kana zvine tsoka dzakaparadzana, zvinodzeya mungazvidya.

Mahwamba akaparadzana. Dzimba remombe rakapatsanurwa nepakati. Kana ichifamba muguruva inosiya tsimba rakaratidzika kuva maviri zvinomiririra zvese Testamente Itsva neTestamente Yekare.

Izvi zvinorevei pamweya?

Kana mukasangana nedzidziso dzakadzama munofanira kugona kudzironda zvese muTestamente Itsva neTestamente Yekare. Kutsigira dzidziso kubva muTestamente imwechete chete zvinoreva kuti ndeyenhema.

Vaya vanoedza kuisa zororo reSabata remusi weMugovera kumaJuda chete nekuTestamente yekare chete vari kurasika. Inobata sezuva rekuzorora kumaJuda kubva kumabasa emaoko muTestamente Yekare asi inobatawo sezororo kubva kuzvivi nekusatenda muTestamete Itsva panoziviswa zvarinoreva pamweya.

Munofanira kudzeya. Kufunga nezvazvo nenguva yako pamunotevera dzidziso muMurairo weTestamente Yekare moona zvichiziviswa nekukudzwa mudzidziso dzeTestamente Itsva dzenyasha. Kukudzwa kwese nekukosha kunofanira kuva pana Jesu nezvaakatiitira.

Hakuna chinoverengwa kana tikaita mabasa.