Salmenes bok 46

1  Til songmeisteren; av Korahs born, etter Alamot*; ein song.

2  Gud er vår hyggja og vår styrke, ei hjelp i trengslor, røynd og funni stor.

3  Difor ottast me ikkje, um so jordi vert umskift, og um fjelli ragar i havsens hjarta,

4  um havbårone dyn og skumar, og fjelli skjelv for deira ofse. Sela.

5  Der er ei å, hennar bekker gled Guds by, den heilage stad der den Høgste bur.

6  Gud er midt i han, so han skal ikkje rugga; Gud hjelper han i morgonlysingi.

7  Folkeslag rasa, rike vart rikka; han let si røyst ljoda, jordi bråna.

8  Herren, allhers Gud, er med oss; Jakobs Gud er vår faste borg. Sela.

9  Kom og sjå Herrens storverk, som hev gjort øydeleggjing på jordi.

10  Han gjer ende på herferder yver all jordi, bryt bogen sund og høgg spjotet av; stridsvognene brenner han upp i eld.

11  Hald upp og kjenn at eg er Gud! Eg er upphøgd millom folki, upphøgd på jordi.

12  Herren, allhers Gud, er med oss; Jakobs Gud er vår faste borg. Sela.