Salmenes bok 27

1  Av David. Herren er mitt ljos og mi frelsa, kven skulde eg ottast for? Herren er verni for mitt liv, kven skulde eg reddast for?

2  Når illmenne søkjer på meg og vil gløypa meg, mine motstandarar og mine fiendar, so snåvar og fell dei sjølve.

3  Um ein her lægrar seg imot meg, so ottast ikkje mitt hjarta; um ufred reiser seg imot meg, er eg endå hugheil.

4  Eitt hev eg bede Herren um, det stundar eg etter: at eg må bu i Herrens hus alle mine levedagar, so eg kann skoda Herrens ynde og grunda i hans tempel.

5  For han gøymer meg i sitt hus på den vonde dag, han løyner meg i løynrom i sitt tjeld, han fører meg upp på eit berg.

6  Og no skal mitt hovud lyfta seg yver mine fiendar rundt ikring meg, og eg vil bera fram offer med fagnadljod i hans tjeld, eg vil prisa og lovsyngja Herren.

7  Høyr, Herre, eg ropar høgt, og ver meg nådig og svara meg!

8  Mitt hjarta ber fram for deg [ditt ord]: Søk mi åsyn! Herre, eg søkjer di åsyn.

9  Løyn ikkje di åsyn for meg, vis ikkje din tenar frå deg i vreide! Du hev vore mi hjelp. Støyt meg ikkje burt og forlat meg ikkje, du Gud som er mi frelsa!

10  For far min og mor mi hev forlate meg, men Herren tek meg upp.

11  Lær meg, Herre, din veg, og leid meg på den jamne stig for mine fiendar skuld!

12  Gjev meg ikkje til mordhugen åt uvenene mine! for falske vitne stend upp imot meg, og folk som frøser av vald.

13  Å, dersom eg ikkje trudde at eg skulde få sjå Herrens godhug i livsens land -!

14  Venta på Herren, ver hugheil, og lat ditt hjarta vera sterkt, ja, venta på Herren!