Første Samuelsbok 31

1  Filistarane gjekk på i striden mot Israel. Israels-mennene rømde for dei, og det låg mange falne på Gilboa-fjellet.

2  Filistarane sette etter Saul og sønene hans og felte Jonatan og Abinadab og Malkisua, Sauls-sønene.

3  Striden vart hard ikring Saul; bogeskyttarane kom yver han, og han vart so redd skyttarane at han skalv.

4  Då sa han til våpensveinen sin: Drag sverdet ditt og renn det igjenom meg, so ikkje desse u-umskorne skal koma og stinga meg i hel og skamfara meg! Men våpensveinen vilde ikkje gjera det - han torde ikkje. So tok Saul sverdet sitt og stupte seg på det;

5  og då våpensveinen såg at han var slokna, stupte han seg og på sitt sverd og fylgde Saul i dauden.

6  Soleis døydde Saul og dei tri sønene hans og våpensveinen og alle mennene hans på ein og same dagen.

7  Og då Israels-mennene som budde på hi sida av dalen, og dei som budde på Jordan-sida, såg at Israels-mennene hadde rømt, og at Saul og sønene hans var falne, tok dei ut og rømde frå byane sine, og filistarane kom og slo seg ned der.

8  Dagen etter kom filistarane og vilde rana det dei falne hadde på seg. Då fann dei Saul og dei tri sønene hans liggjande på Gilboa-fjellet.

9  Dei hogg hovudet av han og rana våpni hans og sende dei ikring i Filistar-landet, alt medan dei bar ut fagnadbodet i avgudstempli deira og for folket.

10  Våpni hans la dei i Astarte-templet, og lekamen hengde dei upp på muren i Betsan.

11  Då mennene i Jabes i Gilead fekk spurt kva filistarane hadde gjort med Saul,

12  tok dei i veg, alle som våpnføre var, og gjekk heile natti; dei tok liki av Saul og sønene hans ned av muren i Betsan, for so til Jabes og brende dei der.

13  Beini deira tok dei og gravla under tamariska i Jabes, og sidan heldt dei fasta i sju dagar.